СЕМЕЙДЕГІ ГИМНАЗИЯ ТӨРІНДЕ ЖАС АҚЫНДАРДЫҢ «ҰЙҚАС ТАБУ» САЙЫСЫ ӨТТІ

Қараша айының соңғы аптасында Семей қаласындағы «Ыбырай Алтынсарин атындағы № 37 гимназияда» шығармашылыққа құштар дарынды оқушылар бас қосқан тағылымды шара өтті. «Ақ қауырсын» үйірмесінің жетекшісі, жас ақындарға бағыт-бағдар беріп жүрген ұстаз Омарғалиев Ерік Қайратбекұлы білім ордасының «Буккроссинг» залында «Ұйқас табу» атты поэзиялық сайыс ұйымдастырды.

Жас талапкерлердің ой ұшқырлығын, тіл байлығын, поэтикалық жан-сезімін дамыту – сайыстың негізгі мақсаты. Сонымен қатар, өлең өнеріне қызығушылық танытып жүрген

үлкен, орта, кіші буынды құрайтын жас шәкірттерге жігер беріп, олардың шығармашылыққа деген ынтасын арттыру көзделді.

Шара барысында, 2 топ өзара бақ сынап, берілген ұйқастарға жылдам әрі жүйелі өлең жолдарын құрастыру арқылы сыннан өтті. Жүргізуші Ерік Қайратбекұлы қатысушыларға 3 түрлі ұйқас нұсқасын ұсынып, шапшаңдық пен шығармашылық қабілетке зер сала отырып, басымдық берді.

Үздік шыққан оқушыларға ынталандыру мақсатында арнайы кітап сыйлықтары табысталды.

Сайыс нәтижесі бойынша:

1-топтың жеңімпазы – 3-сынып оқушысы Жасарбек Расул.

2-топтың жеңімпазы – 5-сынып оқушысы Ахметқали Райана.

Екі жас та өз топтары арасынан озып шығып, ұйқас құраудағы зеректігімен, тапқырлығымен көзге түсті.

Жас ақындарға қанат бітірген бұл шара алдағы уақытта дәстүрлі түрде жалғасады деп күтілуде.